|
مرند اؤیکو(تورکجه حئکایه و ناغیل) اؤیکو - حئکایه - ناغیل - story و...
| ||
|
|
حئکایه جیک یوخولو شهر Riza Hoseini Marand یوخونو گوزلریمه سوخا بیلمه دییمدن گئجه یاریسی کوچه لره ووردوم.شهرده گزرکن چکدییم آهلار بیر نئچه سینی اویاندیردی.بونلار یوخولو اولاراق مندن شیکایت ائدیلر.بو قارانلیقدا سیقاریم بیر اولدوز ساییلیردی،اونودا یاغیش سؤندوردو.منجه یاغیشلار بولودلاردان یوخ،اولدوزلاردان یاغیر.ائوه دؤندویومده عسگرلر اؤنومده سیرالانمیشدی.اونلار توفنگلرینی منه ساری توتوب،بارماقلاری ایسه تتیکده ایدی... سون
یازینین آردی [ پنجشنبه 29 بهمن 1394 ] [ 01:00 ] [ riza ]
[ شنبه 5 دی 1394 ] [ 01:46 ] [ riza ]
یورقان آلتی یورقان آلتیندان باخیردیم.سحر ساعات دوردویدو.سولغون بیر ایشیق ائوی بوروموشدو.آنام سؤیوش وئره رک یورقان- دوشکی حیه طه ساری آپاریردی.بالاجا قارداشیم یاتاقینی باتیرمیشدی.آنام اونون-بونون ائوینده کوله لیک ائله مک دن جانی قورتارمیشدی.گوجو چاتمیردی یورقان - دوشکه.آتام بیر کونجده اوتورموشدو.آنام «الله منی اولدورسون یاخام قورتارسین »دئیه رک قارداشیمی ووردو.سونرا ایسه اونو حاما ساری آپاردی.آغلاماق سسی حامامدا گومبولداییردی.آتام سوسقون گؤزلرینی یئره تیکمیشدی.گؤزلرینین آلتی قارالمیشدی.گونده اون- ایکی ساعات ایشله ییردی.گئجه لر یاخچی یاتا بیلمیردی.ایندی ایسه ایشه گئتمه لی ایدی.پار-پالتارین گئییب قاپیا ساری یؤنلدی.آنام آرخادان گل چای- چوره ییوی آپار دئدی.آتام گئتمیشدی.من ائله یورقان آلتیندا قالمیشدیم.سحر آچیلینا دک یاتا بیلمه دیم.بالاجا قارداشیم یوخودا ایچین چالیردی.من ایسه آتامین گئدیشینی اونودا بیلمیردیم... سون یازینین آردی [ یکشنبه 29 شهریور 1394 ] [ 02:01 ] [ riza ]
یوک یازار:سید رضا حسینی
آی ایشیغیندا کؤرپو اوستونده سؤیکنمیشدیک.قالین و زور بیر سو شاقیلداییب آخیردی.آغاجلار یئلله نه رک سسله نیردی.قیز الیمدن یاپیشیب سئوگیمیزین آتشی داها سؤنور دئدی.باخیشیم آیدا دونوخموشدو.قیز گولومسه ییب دئدی:گل بو سئوگی سؤنمه میشدن اونا سون وئرک.یاپیش الیمدن آتیلاق بو شیلتاق سویون ایچینه.سونرا ایسه قاققیلداییب گولدو.باخیشیمی آیدان یاییندیریب،فیرتینالی سویا دیکدیم.سو آدامی قوینونا آلیردی.فیرتینا قالخدی ایچیمده.قیزا یاخینلاشاراق،گولومسه ییب الیندن یاپیشدیم.قورخدو.داها ظارافات یئتر،چوخ گئجیکمیشیک گل گئدک دئدی. الیندن سرت توتاراق کؤرپونون قیراغینا چکیب یارامازی سویا بوراخدیم.ال-آیاق چالاراق ،گؤزدن ایتیردی.سانکی بئلیمدن آغیر بیر یوک گؤتورله نیردی. قان-تر ایچینده یوخودان قالخدیم.نه قیز،نه کؤرپو،نه ده سو.تکجه یئنه آغیر بیر یوکو حیس ائدیردیم... یازینین آردی [ دوشنبه 16 شهریور 1394 ] [ 11:58 ] [ riza ]
قاچاق سید رضا حسینی چوخ دوشونوردوم بودونیایا یانلیش گلمیشم.آنجاق ایندیسه بوردایام و یاشاییرام.یئییرم،ایچیرم،اوخویورام،یازیرام،دوسلارلا قونوشورام،آنا محبتی دویورام، سئویرم و سئویلیرم و بونلاردان باشقا تانریما اینانیرام.باشقا اینسانلاردان باشقا دئییلم. آنجاق اوره ییم چوخ بوشدو.بوم -بوشدی.هله باشا دوشمه مییشم یاشامدان نه ایسته دییمی!«ائو،عائله،ماشین؟یادا رقص ائیله ییم آلتیندا یاغیشین؟» اوره ییمده ایسته ییمی بیلیرم.آنجاق من ائله اویرنمیشم کیمسیله اورک سوزو آچمایام.سوزون دوزو بو اینسانلار آداما گولورلر .باخیشلاریندان قاچیرام.من اوشاق کن قاچمیشام.هر ندن اوشاق کیمی قاچمیشام.ایندیسه داها دئییرلر بویوک کیشی اولوبوسان.بویا-باشا چاتیبسان.داها دایانمالیسان.نه اولسون کی دایانیم؟قاچسام کیمه نه اولاجاق؟ قاچارام.یئنه ده قاچارام.بیر داها دا قاچارم.قاچاق نبی کیمی عومور بویو قاچاق دوشه رم.اَن سونوندا بودره ییب بیر قبیره دوشه رم.توپراقلار توکرلر اوستومه.قبیر داشیندا دا یازارلار: قبیر یییه سی بیر قاچاق اینسان ایمیش.قاچیب یورولاراق بو ائوده یورقونلوقون آلیر. جومه آخشامی بویوک آتامین مزارینا گئدمیشدیم.ائله یاتیب اوردا،داش کیمی.او گون باتان چاغیندا اوره ییم سیخیلدی !بیر -ایکی تپیک ووردوم قبیر داشینا.قیسقاندیم بویوک آتاما.او آندا بویوک آتامین دئییشیغی منه آیدینییدی. -"گئد جهنم گئده ،گوی یاتاق" من ایسه:-یات گوراخ!الله بیزه ده کریمدی! گون باتدی گئجه اولدو.من یئنه مزار باشیندا!بو سوره ده ،بیر آز آغلادیم.بیلمیرم اؤزومه یوخجا بویوک آتاما.آنجاق اوره ییم بیر آز بوشالدی. آیاقا قالخاراق قیچ-قولوم تام قوروموشدو.سیگار یاخچی اولاردی او دورومدا.توستولویه -توستولویه ائوین یولون توتدوم.سون گؤز یاش توکتویومو اونوتموشام؟دوردان دا بو گؤزلردن چتین یاش دامار!سیگار یاپیشدی.ائوین یولو چوخ اوزاندی.اینامازدیم بئله اوزون -اوزادی اولا.یورولدوم.داها قاچماغادا هئییم قالماییب.چوخ قالیر من بویوک آتاما چاتام.اویونبازلیق دئییل کی.دایان هله.اؤز الیندن بیر ایش گلمیرسه دوروب گؤزله ملیسن... سون
یازینین آردی [ جمعه 26 تیر 1394 ] [ 08:16 ] [ riza ]
قاتار یازار:سید رضا حسینی  ایچمده ،قان ایچینده ییم.یوخوسوزلوق دا باشقا بیر مسئله.داها درمانلار ائتکی بوراخمیر.دونن گئجه بیر یاریم درمان آلدیغیم اوچون بو گئجه داها بیری منی یاتیردا بیلمیر.یاتیردا بیلمیر!!یاتیردا بیلمیر!!!آدام،آدام اولورسا داها درمان گرکمز.سانیرام داها آداملیقدان چیخمیشام.بئینیمه آیری-آیری سؤزلر،رسیم لر،دویغولار و باشقا اولایلار گلیر.آیری دونیادا یاشاییرام.توپراق دونیاسیندا! باشیمی آشاغی سالیب یاشاماق ایسته ییرم آمما دویغولاریم،باخیشلاریم، ساندیقلاریم باشقادیر.داها اؤنومده اولانلاری گؤرمورم.چوخ اوزاقلاردا نه ایسه گؤزله ییرم.سؤزون دوزو دلی اولموشام.گئجه لر دامدا یاتیرام.دیلیمین اوجویلا اولدوزلاری یالیییرام!!هر گئجه بیر قاتار ایلان کیمی بورولوب شهری دولانیب سوزوب کئچیر.اونون سسینی دویماسام صوبحه دک اولدوز یالامالییام! بیر گون یوک-ساپیمی ییغیب قاتارلا گئده جاغام.داها یورولموشام.بوروشوق- دولاشیق دانیشماغی سئومه رم.یورولموشام.چوخ،چوخ یورولموشام. دوست ساندیغیم اینسانلار ایکی اوزلو،یالانچی،دیلنچی،پول قورومساغی.سوچلو اؤزومو سانیرام کی اینسانلاری یاخچی تانیمادیم.هئچ زامان تانیمادیم و اَن سونوندا یئره چالیندیم. یاشامیمدا ایکی اؤزلو اولماییب،اولمایاجاغام.من ایکی دئییلم.من تکجه بیر اینسانام.وارلیغیم بودور.بو اینسانلار آراسیندا وارلیغیمدان دانیشمارام.اؤز- اؤزومه دانیشارام.اینسانلار آشاغیلانماق(تحقیر شدن) و آشاغیلاماقی(تحقیر ائتمک) چوخ سئورلر.بویوکلر ساندیقلاری قارشیسیندا بویوک هوسله توپراقا یاخیلارلار.سانکی اینسانلارین آغیر وارلیقلاری بونلاردان عیبارت اولور. یئنه قاتار سسی گلیر.بیر گون بو یوخ وارلیغیملا گئدمه لییم.ایچمده ایشقلار داها سونوب.بیر شام یانیق قالیب سا دا اونودا اؤزوم سؤندوردوم... سون
یازینین آردی [ دوشنبه 22 تیر 1394 ] [ 07:44 ] [ riza ]
گونش ایله گونه‌باخان یازان: حسین واحدی
ساری ساچلی گونش، گؤیه دیرماشمیش داغلارین آرخاسیندا، خوروزون بانلاماسینی گؤزله‌ییردی. آخشامدان، بوغدا تارلاسیندا اولان یالنیز گونه‌باخان ایسه قارا دنه‌لرینی گونشین باتان یئرینه توتوب، گونشی گؤرمک اومیدی ایله یوخلامیشدی. بیر آزدان، خوروز، سسینی باشینا آتدی. کند ائولرینین چیراق‌لاری بیر-بیر ایشیقلاندی. گونش گؤزله‌دییی آنی گؤرونجه دوغماغا باشلادی. گونه‌باخان، سئوینجک یوخودان اویاندی. سئودییی گونشی بیرداها گؤره بیله‌جه‌یینه چیچه‌یی چارتلادی. چوخ کئچمه‌دی گونش گؤی اوزونده، هر یانی باخیشی آلتینا آلدی. گونه‌باخان، گونش بونون اوچون گلیب‌دیر دئیه، اوزون اوندان چئویرمیردی. او، اوچوب گونشین یانینا گئتمک آرزوسوندایدی. یاواش-یاواش آخشام گلیب چاتیردی. گونش یئره سردییی ساچلارینی داراییب، هؤرمه‌یه باشلامیشدی. گونه‌باخان ایسه گونشین گئتمه‌سیندن اوزولوردو. او، بیلیردی بیرآزدان گونش باتی‌داکی اوجا داغین آرخاسینا گئدیب یوخ اولاجاق‌دیر. چوخ چکمه‌دی گونش دالینا باخمادان، باتی‌نین لاپ او اوزاقلاریندا ایته‌رک قارانلیغی یادیگار قویدو. سون یازینین آردی [ دوشنبه 11 خرداد 1394 ] [ 08:45 ] [ riza ]
[ جمعه 25 اردیبهشت 1394 ] [ 12:07 ] [ riza ]
خینا گئجه سی(حئکایه جیک)  خینا گئجه سینده، اللره یازیلان سؤزجوک لرده سنی آراییردیم. بوتون یولداشلار، سؤزجوک لرین شکیلینی اللرینده قیزاردیردیلار. اووجومون اورتاسیندا کی توپلانمیش خینانین سرینلیگینی دویارکن دووارا باخیردیم. یولداشلار گولومسه یه ـ گولومسه یه بیر بیرینین اووجونداکی سئودا سؤزجویونه باخاراق، منیم یومولموش و سیخیلمیش اووجوما گؤزلری تیکیلدی. هامی نین اووجو آچیلیردی و نقش اولونموش بیر اوره ک شکیلینین ایچینده، سئوگی لی آدین بیرینجی سؤزجویونو، بیر بیرینه گؤرسه دیردیلر. a ،d ، v ، e ، s ... و سئوگینی اللرینده اویناداراق قاداسینی آلیردیلار؛ جئیرانیمدی، نازیم دی، اوره ییم دی دئمک له. یومولموش اووجوملا کاغاذ مندیل پایلایانا گؤزوم ساتاشدی و اونون آردیندا الینده زیبیل قابی اولان بیر اوشاق، سئوگیه به لنمیش مندیل لری قابا تؤکوردو. بوتون یولداشلارین گؤزلری منیم اووجوما تیکیله رک، یازیلان سؤزجویو حدس ووروردولار. من ایسه بئینیمده هئچ بیر سؤزجویون اولمادیغینا گؤره کدرلی. اووجوم آچیلدی و اینانمادان الیمده یازیلمیش "t" سؤزجویونو گؤردوم. ههههه...! تومروس دور، یوخسا تورک آی؟ آی قورد! تورکان دیر یوخسا تئللی ناز؟ هره بیر سؤز دئییردی؛ آنجاق هئچ کیمسه نین فیکیرینه "تانری" گلمیردی! سون
یازینین آردی [ پنجشنبه 7 اسفند 1393 ] [ 10:49 ] [ riza ]
"گونئی آذربایجان حئکایه تاریخینه قیسا بیر باخیش" حمید آرغیشین "80 ایل حئکایه میز" کیتابیندان خولاصه ائدن:سید رضا حسینی
بو لینکدن ائندیرین: یازینین آردی [ چهارشنبه 6 اسفند 1393 ] [ 11:44 ] [ riza ]
|
|
| [قالب وبلاگ : تمزها] [Weblog Themes By : themzha.com] | ||
